 Bə Fəramərzə bırəm əzizə xoto
Milləti hırdən həmə Məsrur bedə.
Hındılə peşt, Təyləsani qardəmon,
Xalxali, Fuməni bə yod vardəmon,
Masali, Masuləro lap mardəmon,
Dardi ğıbo xırtədə pürşur bedə,
Dastədə zənci vırə xuncur bedə.
Hındılə peşt, ranqe-Əsalem pərə,
Poz bə çı Taleşdulabi mənzərə,
Vindəme Rizvanşəhəro çan kərə-
-Vəşdə otəş, çoknə ki, pürnur bedə-
Mil jedə yəğma bə çəşi, kur bedə.
Hındılə peşt, kare-Nəmin işqile,
Jiynə Ostoro sərəse müşqüle,
Peynə Ostoro de lüzi məşğule,
Like, Lankone hələ pürşur bedə,
Masalli dı mehnəti rəncur bedə.
Hındılə peşt, Həmoşərü əfsonə bə,
In Biləsıvo çə Biləsıvo çonə bə,
Vaqədizən peş bə vaqon lonə bə,
Pələnqi bandondə vaqon cur bedə,
Vaqə sədo zım jedə, qur-qur bedə.
Hındılə peşt, çəş bıkə bılbıl bome,
Vıl bə külonsə üjənən vıl bome,
Havzə xolonsə siyo hındıl bome,
Fəsli zımıston şəbu, bumxur bedə,
Korpə şivon barzəsə ambur bedə.
Hındılə peşt, Məsruri şe dardı ka,
Ğəm-ğıboku havzə livon zardı ka,
Iştə xolon marzi səpe pardı ka,
Qıryə məkə, avə bə peşt nur bedə,
Kur bə kəson çəş də nuri pur bedə,
Hındılə peşt, əfloki pər qardedə,
Əhrimoni kəy Xıdo xo kardedə,
Hu bı məhol rüşnə rüjon vardedə,
Vanq bə ico İsrafili sur bedə.
Bəzzi ğələ sə bəməno Tur bedə.
Hındılə peşt, həx votedəm, ım həxe,
Çəx-çəxənə boştəro bə çəx-çəxe,
Ki perəxe orzu kay oxoy rəxe,
Dı həvəsi şe-şe dılon zur bedə,
Co bə cüyon cəm yolə ovşur bedə.
Hındılə peşt, bastə bəon oj bəbe,
Vey nezədəy, ım şəviən rüj bəbe,
Zındəni ki?- yarə bıbu doj bəbe,
Hırdə zükə çarə nıkoş ur bedə,
Hur əpiyon əvvəl-oxoy hur bedə,
Hındılə peşt, ıştə ğədi pey bıkə,
Rişə səpe havzə xolon vey bıkə,
Tij bə teğon rüjbərüj heve bıkə,
Ğüssə məkə, vanqe-Tolış qur bedə,
Milləti hırdən həmə Məsrur bedə.
"Tolışon Sədo” rüjnomə, N: 03 (15), 2012
|
