20-nə əsri 30-nə soronədə bənə SSRİ qıləy totalitar İmperiya ve ğədimə xalqon nomonış çı dınyo xalqon siyahiyo bekardje, çəvon nomonış ləğ karde! Bo həmonə xalqon mande-jiyero mubarizə bardə, çəvon ğıryətinə ruşinfikə evladonış repressia kardıje, kıştıje!
Çə xalqonədən qıləy, bı zəminədə jiemoni tarixış bəlli nıbə Tolışi xalqbe! SSRİ İmperiya çı Tolışi nomi qəte ğəti-ğədəğəş karde! Çəy sə lovnə zonış vısilka karde bə Sibir, vəğınışən əvon kışte! Çəmə Zılfiğor Əhmədzodə, Beyqəğə Mirsalayev, Mızəfər Tolıbi ijən co yolə ruşnəfikə zon bı roədə şəhid ben!
Çı xalqon həbsxonə bə SSRİ İmperiya əncəx ıştə jiemoni oxonnə soronədə, de çəmə xalqi kali mərd, ruşnəfik, ğıryətmandə zon zu, de çəvon nışo doə mubarizə sayədə çı Tolışi nomış sənibəton reablitasiya karde məcbur be!
Be mubaliğə bəbe vote ki, çı həmonə ruşnəfikon iminə obə vılonədə qıləyən çı Tolışi ve məhşurə ictimai-siyosi xadim, navəşən, lider İbrahimi Zahirəddine!
20-nə əsri 80-nə soronədə de Zahirəddin muəllimi şəxsi təşəbbusi çı Lankoni rayoni Şağlase diədə de Tolışi zıvoni, mədəniyyəti, milli-mənəvi dəyəron, mental adət-ənənon təbliğ karde məşğul bə "Avesta” İctimai Cəmiyyəti fəaliyyətış bino karde!
"Avesta” bo Tolışi zıvoni nımardero, bo xalqi milli ıştəni ifadə kardero mıslıj nıbə ve yolə kon kardıje! Çəy "Əvəsor” ansanblədə Tolışi zıvonədə ifa kardə bə mahneon bə çəmə musiqi mədəniyyəti ve yolə töhfonıj doy!
De ve yolə fəxarəti bəbe vote ki, Zahirəddin muəllim İbrahimi ıştə jiemonış səyku bə po bə Tolışi mədəniyyəti, tarixi, adət-ənənon ijən co milli-mənəvi dəyəron rostbemoni həsrıj kardə!
Əv çı Tolış xalqi milli-mənəvi sərvəton ıştənədə etivo kardə ve nadir qıləy şəxsiyyəte!
Dınyo ha vırədə jiyə tolış de Zahirəddin İbrahimi nomi fəxr bəne karde!
Zahirəddin muəllim çımi bə peşt hiç koən nıkə, dosə ımrujnə ruj çı Tolışi roədə çəy kəşə zəhmət bəmə tam əsas dydə ki, bıvotəmon; "çəy nom de ğızılə hərfon eqınə bə Tolışi tarix!”
Ve hurmətinə tolışon!
Imruj, çı fevrala manqi 22-də çəmə xalqi ve şərafətinə, yolə ruşnəfikə zoə Zahirəddin İbrahimi 60 sinış təmom bedə!
Boən, həmə i vırədə ıştə xalqi ve ləyoğətinə, mudrikə, cəfokəşə ruşnəfiki, sıprişə merdi – Zahirəddinə boli de 60 sorə yubiley munasibəti dıli sıxto təbrik bıkəmon! Xıdovandə-Aləmiku bayro dırozə umur, xəşəconəti orzu bıkəmon!
Xose mıborake, çəmə şınə-şəkə Zahirəddinə boli!
Bə Zahirəddinə boli Şımə həmə nomo de ve yolə hurməti,
Mehdibəy Səfərov
Azəri – Tolış İctimai İbemoni sədr
