 Bu gün səhər saatlarında (9.30-10.30) Avropa İttifaqının Azərbaycan Respublikasındakı nümayəndəliyində Avropa Birliyinin Avropa Qonşuluq Siyasəti və Genişlənmə məsələləri üzrə komissarı Stefan Fülenin rəhbərlik etdiyi nümayəndə heyəti hüquq müdafiəçiləri: Leyla Yunus, İntiqam Əliyev, Hilal Məmmədov, Əvəz Həsənov və "Azadlıq” radiosunun əməkdaşı Xədicə İsmayılova ilə görüş keçirmişlər.
Görüşdə Leyla Yunus və Xədicə İsmayılova ölkədə insan haqqlarının kobud şəkildə pozulması, jurnalistlərə peşə fəaliyyəti ilə bağlı olaraq göstərilən təzyiqlər, vicdan və siyasi məhbusların işgəncələrə məruz qalması və bəzilərinin faciəli şəkildə qətlə yetirilməsi barədə məlumat vermişlər…
Hüquq müdafiəçisi Hilal Məmmədov isə ölkədə milli azlıqların problemlərindən və dindarlara qarşı göstərilən haqsız siyasi təzyiq, təqib və həbslərdən söhət açmışdır. O, bildirmişdir: Əfsuslar olsun ki, bu gün ölkəmizdə insan haqqları ilə bağlı bu və ya digər problemlərdən az-çox şəkildə cürətlə danışan bəzi hüquq müdafiəçiləri milli azlıq və ya dindarların problemləri ortaya çıxdıqda ya susur, ya da iqtidarla bir cəbhədə birləşərək bu sahədə ölkədə böyük tolerantlığın mövcudluğundan ağız-dolusu danışırlar… Ən dəhşətlisi isə İran-Azərbaycan münasibətlərinin gərginləşməsi fonunda müxtəlif çirkin bəhanələrlə onlarla sıravi dindarların, ziyalı və alimlərin "vətənə xəyanət”, "casusluq” kimi qondarma ittihamlarla uzun müddətə zindana atılmasıdır. Biz bu məsələdə yalnız o bəzi zəif və ya ədalətsiz hüquq müdafiəçilərimizi və ya ictimai-siyasi təşkilat rəhbərlərini deyil, həm də Sizi - Avropa və Amerika rəsmilərini məzəmmət etmək istəyirik. Siz deyin, nə üçün yüzlərlə sıravi insanlar, jurnalistlər, dindarlar beynəlxaq siyasi oyunların qurbanı olmalı, ailə və övladları isə on illər ərzində min bir əziyyətlə atalarının və ərlərinin həsrətini çəkməlidirlər? Siz deyin, Azərbaycanın cənubunda yaşayan, qədim bir xalqın – Talışların yeganə mətbu orqanı olan "Tolışi Sədo”("Talışın Səsi”) qəzetinin baş redaktoru və Talış Mədəniyyət Mərkəzinin rəhbəri olmuş 70 yaşlı qocaman bir dilşünas alim - professor Novruzəli Məmmədovu "İrana casusluq” kimi absurd ittihamlarla mühakimə edib, sonra özünü və ailəsini məhv edən, qoca xanımını isə qürbətdə yaşamağa məcbur edən bir rejimə necə bəraət qazandırmaq olar? Siz deyin, "İrana casusluq” kimi qondarma bəhanələrlə onlarla sıravi insanları bədbəxt edib, ailələrini yetim qoyan bir rejimin siyasi oynuna "uğurlu əməliyyat” deyən ABŞ diplomatları dünyada hansı ədalət ya demokratiya prinsipindən danışa bilər?"
Hilal Məmmədov çıxışının bu sözlərlə bitirmişdir: "Cənab Stefan Füle və möhtərəm Nümayəndə heyəti, yəqin ki fikrimi anladınız, - biz elə bir ölkədə yaşamaq istəyirik ki, orada İNSANLAR dilindən, dinidən, məzhəbindən, cinsindən, ictimai-siyasi-sosial baxışlarından, vəzifələrindən, dövlətin daxili və xarici siyasətindən asılı olmayaraq vahid QANUN qarşısında bərabər hüquqlara malik olsunlar. Əminik ki, bu yolda Avropa İttifaqı da bizə real yardımçı olacaq və ölkəmiz ilə beynəlxaq münasibətlərində İNSAN HAQQLARIna daha prioritet yer verəcəkdir..
TALISH.ORG
|
