 Tasadüfən bəçəmə das eqınyə "İkiüzlü dünya” kitobi səpe Cavanşir Pərviz Muxtari nomi vindeədə itkəm bə dumot şimon: yəni, müəllif çəmə ə kanə düst iən məsləkdaş Cavanşir Qasımove? De ım iən de "Bəqəm əv şeyrən nıvıştəbe?!” - fik-şəki bə Lankon zanqımon karde və omutemone ki, bəle, həğğətən, əv - "çəmə Cavanşire!”.
1993 tovostoniko peş, bənə çəmə ve ğeyrətmandə patrioton, bəçəy səən omə həzo dard-səron i zınqıri çı kitobi "Dəmir qəfəs”, "Yaddaş”, "Kədərim-qəmim” iən co vıronədə bənəy coninə filmi vindeədə, ijən bə dumot şimon: Ya Xıdo, ım çand əsron-soronədə bə çəmə milləti iən əçəy mucahidon sə omə ənnə zılmi-cəfo sırron, hikməton çiçe binim?!... Peşo, ijən de dıvo bəştə dılvandi doydəmon ki, "Ya Xıdo, bəsə dəşdəmon ki, Iştı vığandə ha bəd ya xoş hadisonədə boəməno qıləy dərs, qıləy ibrət, qıləy rəhm heste, əve, ijən bətı lovə kardəmon ki, TI ıştən çəmə xəlği noğo bikə və əy çı şəytonon şəriko hifz bıkə!”...
Əmənən ico bə Cavanşir müəllimi dard-səron şərik beşedəmon. Xıdo çəy mubarəkə zoən rəhmət, vırəş cənnətin bıkə, inşalla!
Diən bıbo, çəmə yolə şair, muəllim, xəlği mücahidə zoə Cavanşir Pərviz Muxtari de 60 sininə yubileyi mınasibəti sidqi-dıliko təbrik kardəmon. Duzi, hiç bə ağlımon nəvoy ki soron joqo rə bəpəren...
Soron bıpəronən, sə mu-rişon sipi bıbonən, amma, peştpuremon ki, çey ğəlbi ən şinə hisson ifodə kardə jiədəki ım tolışə boyation çəmə mucahidə ruhi həmişə tojə - həmişə cıvon – həmişə sof obəğate!!!
In kinə çiki kinəy,
Dastonıj bənə xınəy.
Bə honi rərə şedə,
Honi bəy qləy vonəy.
In kinə kenə yol be,
Ki vində əv behol be.
Pidəme qəp bıjənım,
Zıvonım vəyo lol be.
In dardım yolə darde,
Nibəşe tasə marde.
I kərə pedyəsəm bəy,
çəşonıj ovsin karde.
Boğədə vılon bıçın,
çəvo i dastə dəçın.
Bə ovəynə diəkə,
Əv reçine, tı reçin?
çəmə sevgi tı haste,
çəşonım çəyku aste.
Hiç nıbo insof bıkə,
Boy çımı yarə baste.
In kinə çoko beşe,
Jıqo bən həşi çaşe.
Ha de ikərə vinde,
Oməy bə dılım dəşe...
Çarbədar,
Tolışi Sədo, №1, 2011
|
