Главная » 2013 » Январь » 29 » Hilal Məmmədov Rüstəm İbrahimbəyovla bağlı müraciət etdi
23:57
Hilal Məmmədov Rüstəm İbrahimbəyovla bağlı müraciət etdi
Azərbaycan elitasının görkəmli nümayəndəsi Rüstəm İbrahimbəyova qarşı səngimək bilməyən təqib və təzyiqlərlə bağlı olaraq, siyasi məhbus Hilal Məmmədovun dünya ictimaiyyətinə Müraciət ünvanlayıb. Müraciətdə deyilir:
Möhtərəm cənablar və xanımlar!
Dünyanın cəmi haqqsevər və tərəqqipərvər qüvvələri və nümayəndələri kimi, mənəvi dəstəyinizə böyük ehtiyac duyaraq, hədsiz həyacan hissi ilə hamınıza aşağıdaki müraciəti etməli oluruq:
Artıq böyük bir qisminizə bəlli olduğu kimi, bu gün vətənimiz Azərbaycanda İnsan haqqlarının bilavasitə hakimiyyət orqanları tərəfindən ən kobud və hətta kriminal metodlarla tapdalanması adi bir hal almışdır: ölkədə fərqli düşünə bilən, haqqını tələb edən, söz və fikir azadlığı naminə mübarizəyə qoşulan istənilən azadfikirli insan ən iyrənc formada təqib, təzyiq, şantaj, həbs və hətta qətllərlə qarşılanır.
Bu gün bu haqsız zülmlərə məruz qalanlardan biri də dünyanın görkəmli mədəniyyət xadimi, yazıçı-dramaturq, kino-rejissor Rüstəm İbrahimbəyovdur. Xalqımızın bu nüfuzlu elita nümayəndəsinə qarşı təqib və təzyiqlər artıq bütün hüquqi və etik normaları aşmaqdadır: ona məxsus ya rəhbərlik etdiyi hər sahədə qərəzli "dövlət” yoxlamaları; ən ləyaqətli işçilərinin belə ona qarşı qaldırmaları; hakimiyyət meyilli insanlar və KİV tərəfindən ünvanına ən nalayiq iftiralar yaxmaları; Bakı aeroportunda qanunsuz saxlanılması və i.a. mənfur hərəkətlər səngimək bilmir.
Möhtərəm cənablar və xanımlar! Artıq 8-ci ay nahaqdan zindan iztirablarını yaşayan bir alim, pedaqoq, hüquq-müdafiəçisi, qəzet redaktoru və sıravi vətəndaş kimi Rüstəm İbrahimbəyova qarşı gözlənilə bilən daha dəhşətli təhlükəni hiss edərək, Sizə müraciət edirəm: Yalnız Azərbaycanın deyil, cəmi bəşəriyyətin böyük oğlu sayılan, həyat və yaradıcılığını tamamən insanların sağlam mənəvi tərəqqisinə həsr etmiş bu beynəlmiləlçi dahi şəxsiyyəti qorumaq – yalnız həmvətənlərinin yox, dünyanın bütün haqsevər və tərəqqipərvər qüvvələrinin və nümayəndələrinin mənəvi və vicdani borcu olmalıdır. Odur ki, hamınızı, o cümlədən azad mətbuatı hüquq normaları çərçivəsində "Rüstəm İbrahimbəyova qarşı təqib və təzyiqlərə son qoyulsun!” şüarı ila onun müdafiəsinə qoşulmağınıza çağırıram.
Bu Haqq yolda cənabi HAQQ hər birinizə YAR olsun!
Hamınıza hörmətlə Hilal Məmmədov Kürdəxanı həbsxanası 27 yanvar 2013-ci il
