Главная » 2012 » Август » 24 » Hilal Məmmədovun işi ilə bağlı ictimai müzakirələr keçiriləcək
23:54
Hilal Məmmədovun işi ilə bağlı ictimai müzakirələr keçiriləcək
Avqustun 24-də Helsinki Vətəndaş Assambleyasının Azərbaycan Milli Komitəsinin (HVA AMK) qərargahında Hilal Məmmədovun Hüquqlarının Müdafiə Komitəsinin növbəti iclası keçirilib. Gozetci.az portalının məlumatına görə iclası açan HVA AMK-nın sədri və komitənin həmsədri Arzu Abdullayeva gündəlikdə duran məsələləri bəyan etdikdən sonra, Komitənin Hüquqşünaslar Qrupunun hazırladığı hüquqi arayışın yaxın günlərdə tam hazırlanıb ictimaiyyətə təqdim ediləcəyini bildirib. Komitənin fəal olmasını vurğulayan A.Abdullayeva vicdan məhbusu Hilal Məmmədovun həbsinin Azərbaycanda millətlərarası ədavətin qızışdırılmasına hesablandığını xüsusi vurğulayıb. Eyni zamanda Arzu xanım Hilal Məmmədovun müdafiəsinin məhsuldarlığının artırılmasında daha çox görüləcək işlərin olduğunu və bu planda Komitədə yaradılmış Mətbuat Qrupunun səyinin artırılmasının zəruriliyini deyib. Arzu xanım Mətbuat Qrupunun fəaliyyətindən böyük gözləntilərin olduğunu bildirərək, Turan İnformasiya Agentliyinin direktoru və Komitə üzvü Mehman Əliyevə Mətbuat Qrupuna cəlb olunmuş jurnalistlərə dəyərli məsləhətlərin verilməsindən ötrü ayrıca toplantıların keçirilməsini tövsiyyə edib.
Komitə üzvü Hacı Cahangir Suvarov bildirib ki, 15 avqustda Hilal Məmmədovun qeyri-qanuni həbsi ilə bağlı Qafqaz Müsəlmanları Ruhani İdarəsinin sədri Hacı Allahşükür Paşazadəyə yazılı müraciət edib və QMRİ-dən aldığı məlumata görə artıq onun məktubuna cavab hazırlanır və çox guman ki, bu yaxınlarda həmin cavabı alacaq. Komitənin digər həmsədri Rafiq Cəlilov çıxış edərək Turan İA-nin Komitənin fəaliyyətinin tam işıqlandırılmasnda həmişəki kimi çox yaxından iştirak etdiyini və buna görə Turan İA-nə öz təşəkkürünü bildirib.
Rafiq Cəlilov deyib ki, Hilal Məmmədovun istintaqı Bakıda yox, Lənkəran və Astara rayonlarında aparılır, prokurorluğa çağırılan adamlardan alınan izahatlar barədə heç bir məlumat yoxdur və çox güman ki, prokurorluq Hilal Məmmədovun üzünə durğuzmaq üçün yalançı şahidlər axtarır. Vəkil Xalid Bağırov bununla bağlı qeyd edib ki, belə yalançı şahidlərə bir neçə məhkəmə iclaslarında rast gəlinib və onları ancaq ictimai qınaqla bu işdən çəkindirmək olar. Mehman Əliyev bundan sonra da Komitəyə bütün mümkün dəstəyi verməyə davam edəcəyini deyib. Bununla belə Mehman Əliyev daha iki təklif verib. Birinci təklifə görə Mətbuat Qrupu Hilal Məmmədovun həbs olunduğu vaxtdan bu günə kimi bütün baş verənlərin xronoloji tarixi faktları əks olunan hesabatı, avtoportret yazını və hüquqi arayışı tərtib etməli, bu sənədləri həm ölkə, həm də dünya ictimaiyyətinə təqdim etməlidir. İkinci təklifə görə isə Komitə avqustun 28-də Hilal Məmmədovun məhkəməsindən bir gün əvvəl geniş tərkibdə ictimai müzakirələr keçirsin. Mehman Əliyevin bu təkliflər qəbul olunub.
Daha sonra çıxış edən vəkil Xalid Bağırov ən azı üç məsələ ilə bağlı məhkəmə davasının açılmasını bildirib: "Bu Hilal Məmmədov həbs edilən zaman hüquqlarının pozulması, ev axtarışı və döyülməsi ilə bağlı şikayətlərdir”.
Komitə üzvü, hüquq müdafiəçisi Elnur Məlikov Hilal Məmmədovun azadlığa buraxılması ilə bağlı etiraz aksiyalarının vicdan məhbusunun azadlığa buraxılmasına müsbət və ya mənfi təsir olunacağını müzakirəyə çıxarılmasını təklif edib. Müzakirələr zamanı bəlli oldu ki, etiraz aksiyalarının necə təsir edəcəyi onun təşkilatçılarından daha çox aslıdır.
Müzakirələrdə çıxış edən politoloq Zərdüşt Əlizadə bildirdi ki, hakimiyyət müəyyən oyunları və məqsədləri üçün ziyalıları, jurnalistləri və ictimai fəalları həbsə atır: "Ancaq bizim də borcumuz bu məsələləri ictimailəşdirməkdir”.
