Əli Nasir! Bu ad çağdaş Azərbaycan tarixində "azadlıq", "müstəqillik", "demokratiya" kəlmələri ilə simvolə olunur, bu dəyərlərlə sinonim səslənir!
Əl Nasir özünü dərk etdiyi andan ürəyi daim müstəqillik arzusu, azadlıq eşqi, dilindən və dinindən asılı olmayaraq, demokratik, sivil dəyərlərə söykənən, bərabərhüquqlu vətəndaş cəmiyyəti quruculuğu istəyi ilə döyünmüş, döyünməkdədir!
Bu istək və arzulara rəğmən o, doğulduğu, boya-başa çatdığı Lənkəran şəhərində mənsub olduğu Talış xalqının adını qadağan, milli-mənəvi dəyərlər sistemini darmadağın, bu dildə yazan, düşünən, onu yaşatmaq istəyən hər bir ziyalısını amansız üsullarla repressiya edən, xalqlar həbsxanasına çevrilmiş "SSRİ" adında totalitar İmperiyanın çökməsinin, süqutunun əsasını qoyan birincilərdən oldu! Onun istiqlaliyyətə çağırış, vətənpərvərlik ruhunda qələmə aldığı saysız-hesabsız odlu-alovlu poeziya nümunələri insanlarımızın müstəqilliyə, azadlığa olan təşnələrini bir daha artırırdı. Fədakar şairin "Ey ana vətən!" marşının sədaları altında Lənkəranda, Bakıda, eləcə də ölkəmizin bütün regionlarında milyonlarla insanlar müstəqillik, azadlıq eşqi ilə meydanlara axışırdı...
Məhz, vaxtı ilə, amansız vəhşiliklərlə davrandığı bir xalqın Əli Nasir kimi mərd, cəsur, ölümlərindən qorxmayan qəhrəman övladları tərəfindən ilk dəfə olaraq, onurğa sütunu qırıldı, çökdü, yerlə yeksan oldu, ilk baxışdan tirana bənzəyən bu, "SSRİ" adlanan, içi boş "çiçula"nın!
Azad oldu, Azərbaycan! Müstəqillik qazandı, ana vətənimiz! Bütün mənalı həyatını, canını, varlığını, ruhunu həsr etdi, bu azadlığa, bu müstəqilliyə, Əli Nasir!
Qanı, canı hesabına qazandığı bu müstəqilliyin ilk "hədiyyəsi" 10 illik zindan həyatı oldu - ədalətsizliklərə, bərabərsizliklərə, ifrat millətçiliyə, regionçuluğa və digər eybəcərliklərə qarşı səsini sərt, ucadan qaldıran, bu cismən arıq, cılız, lakin ruhən uca, nəhəng və çılğın şairimizin!
Lakin o, əyilmədi, çəkinmədi, sönmədi, sınmadı! Yazdı, yaratdı! Yandı, alovlandı! Azərbaycan ədəbiyyatına, mənsub olduğu Talış xalqının ədəbiyyatına yeni-yeni misilsiz poeziya nümunələrini, maraqlı bədii əsərlərini hədiyyə etdi!
Azərbaycanın müstəqillik qazanılmasına verdiyi misilsiz töhfələrə "ənam" olaraq, məhkum edildiyi 10 illik zindan həyatı sağlamlığını əlindən aldı, qocaltdı şiri-nərimizi, fədakar ruh şairimizi!
Bir neçə gün sonra, 60 yaşı tamam olur, yarıcan, ağır xəstəliyə düçar olmuş, "Kül qalağında KÖZ"ə dönmüş bu pak, munis, vətənpərvər şair Əli Nasirin!
Nədənsə, müstəqilliyin bəhrəsindən yararlanan, yararlandıqca da xumarlanan bürokrat məsuliyyət sahibləri unudublar - tamam unudublar ki, onlar bu gün ƏLİNASİRLƏRİN hesabına xoş güzəran keçirdir, feyziyab olurlar! Nə olar! Keçirdin! Amma, arada yada salın! Yada salın ki, haqq var, hesab var!
Bu gün, müstəqilliyinə həyatını fəda etdiyi odlu-alovlu, istedadlı, böyük vətənpərvər şair Əli Nasirin 60 illik yubileyidir! Qeyd eləmək lazım deyilmi, bu boyda nəhəng inqilabçı-şairin yubileyini, cənab səlahiyyət sahibləri!? Halala, harama heç inanmırsınız?!
Nə deyirsiniz; qeyd etməyək, ölkəmizin azadlıq simvollarından biri olan Əli Nasirin 60 illik yubileyini! Bu sayaq nümunələrmi göstərək, yetişməkdə olan gəncliyimizə!?
Zənnimcə, düşünməyə dəyər!
Özü də ciddi düşünməyə!!!
Mehdibəy SƏFƏROV
moderator.az
