Главная » 2012 » Июнь » 30 » Talış bölgəsi ziyalılarının Hilal Məmmədovun hüquqlarını müdafiə komitəsi yaradılıb
16:09
Talış bölgəsi ziyalılarının Hilal Məmmədovun hüquqlarını müdafiə komitəsi yaradılıb
27 iyun 2012-ci ildə Lənkəranda Talış bölgəsi ziyalılarının Hilal Məmmədovun hüquqlarını müdafiə komitəsi yaradılıb. Tanınmış ictimai-siyasi xadim Hüseynqulu Məmmədli müdafiə komitəsinin sədri seçilib. Komitə Azərbaycan ictimaiyyətinə bəyanatla müraciət edib. Bəyanatda deyilir:
Lənkəran ziyalıları, hüquq müdafuəçisi, "Tolişo sado” qəzetinin baş redaktoru, riyaziyatçı alim Hilal Məmmədovun narkotik maddələrin saxlanılmasında şübhəli bilinərək həbs edilməsini hiddətlə pisləyir və bunu hakimiyyətin ölkə vətəndaşlarına qarşı yolverilməz təzyiq kompaniyasının tərkib hissəsi hesab edir. Narkotik maddələri, onlardan istifadəni cəmiyyətin bəlası hesab edən insanları "narkotik satan və istifadə edən” ittihamları ilə həbslərə məhkum edən hakimiyyət bu hərəkətləri ilə öz xalqına qarşı apardığı repressiya niyyətlərini bir daha sübut etməkdədir. Sivil vətəndaş cəmiyyətinin formalaşması uğrunda mübarizə aparan və bu mübarizədə öz fəallığı ilə fərqlənən insanlardan biri olan Hilal Məmmədovu belə saxta ittihamlarla həbsə atmaq ölkədə vətəndaş haqlarını qorumalı olan hakimiyyətin, qoşulduğu beynəlxalq konvensiyaların tələblərini kobud şəkildə pozulması, yaradılmış diktatura mühitinin saxlanmasına cəhdlərin gücləndirilməsi deməkdir.
Azərbaycan çoxmillətli ölkədir və burada yaşayan millətlər arasında həmişə qarşılıqlı anlaşma, milli dəyərlərə hörmət mühiti hökm sürüb. Hilal Məmmədov da mənsub olduğu talış xalqının milli-mənəvi dəyərlərini tədqiq və təbliğ edir, talış folklorunun araşdırılması istiqamətində elmi araşdırmalar aparır, millətlərarası məsələlərdə bərabərliyi, milli həmrəyliyi ardıcıl olaraq təbliğ edir, bu sahədə cəmiyyətə ciddi yaradıcılıq nümunələri bəxş edir.
Son 8-10 ildə Azərbaycanda vətəndaşların mülkiyyət hüquqları, söz və səs azadlığı, insan haqları daha böyük sürət və iyrənc təpkilərlə pozulmaqdadır. Bütün bunlar azmış kimi hakimiyyətin vətəndaş haqlarını qorumağa azacıq belə cəhd göstərənlərə böhtan atmaqla onları fiziki cəzalara, işgəncələrə məruz qoymaq üsullarından istifadə edilməyə başlanması bütün vətəndaşları narahat etməyə başlayıb.
Nəticədə təkcə hakimiyyətin deyil, Azərbaycanın tоlеrant və dеmоkratik imicinə zərbələr vurulur ki, bu da aşkar təхribat kimi dəyərləndirilməlidir, dеməli ölkəmizə vurulan zərbədir. Hakimiyyətin vətəndaşlarına girov kimi baxmasını, istədiyi halda istədiyi adamı qanunsuz və iyrənc üsullarla həbsə almaq ənənəsini qətiyyətlə pisləyirik.
Lənkəran ziyalıları olaraq hökumətdən tələb edir ki, Hilal Məmmədovun bu cür böhtan və əsassız ittihamlarla həbs edilməsinə son qoysun və onu dərhal azadığa buraxsın.