 AŞPA monitorinq komitəsinin Azərbaycan üzrə məruzəçiləri Pedro Aqramunt Font de Mora (İspaniya) və Cozef Debona Qreş (Malta) insan hüquqlarının pozulması faktlarını etiraf etmək istəmirlər. Bu barədə bugünki mətbuat konfransında Sülh və Demokratiya İnstitutunun direktoru Leyla Yunus bildirib.
O hesab edir ki, məruzəçilər tamahkar məqsəd güdürlər, Azərbaycan hökumətindən rüşvət alıblar. Yunusun bu iddialarına onların Azərbaycandakı vəziyyət haqqında məruzələrinin ilkin variantı və məruzəçilərlə dünənki görüş əsas verib.
Yunus bildirib ki, məruzəçilər, faktiki olaraq, insan hüquqlarının pozulması faktları haqqında onlara təqdim edilmiş bütün materiallara məhəl qoymayıblar və onları ilkin hesabatlarına daxil etməyiblər. "Belə bir təəssürat yaranır ki, bu sənədi Azərbaycan prezident administrasiyasında yazıblar”, deyə Yunus bildirib.
Xüsusən, MTN istintaq təcridxanasında Turac Zeynalovun işgəncələrdən ölməsi, naxçıvanlı fəal Zeynal Bağırzadəyə qarşı işgəncələr, "Xəyal” telekanalının iki jurnalistinə qarşı işgəncə faktları hesabatda yer almayıb.
"İfadə azadlığı” fəslində jurnalistlər Əvəz Zeynallının, Anar Bayramlının həbsi, İdrak Abbasovun döyülməsi və Xədicə İsmayılovanın təqib olunması faktları əks olunmayıb.
"Birləşmək azadlığı” ilə bağlı müstəqil QHT-lərin qeydiyyatından imtina problemi yer almayıb.
Vətəndaşların kütləvi şəkildə evlərindən köçürülməsinə gəlincə, məruzəçilər əsassız olaraq sakinlərin "mütləq əksəriyyətinin” kompensasiyalardan razı qaldığını iddia edir. Onlar köçürülmənin şəhərsalma planına uyğun olaraq həyata keçirildiyini qeyd edirlər. "Lakin Bakının yeni baş planı yoxdur, köhnəsinin müddəti isə 2005-ci ildə başa çatıb. Vətəndaşların kompensasiya həcmindən razılığına gəlincə, onların bu rəqəmləri haradan aldıqları aydın deyil, çünki özləri heç kimlə görüşmədiklərini etiraf edirlər”, deyə vəkil Fuad Ağayev bildirib.
Bu zaman məruzəçilər heç kimin mülkiyyətinin məhkəmə qərarı olmadan dağıdıla bilməyəcəyi faktına məhəl qoymayıblar. Bundan başqa, bakılıların evləri məhkəmələrin söküntünün dayandırılması haqqında qərarlarına belə baxmadan sökülüb.
Ağayev məruzəçilərin hər kv. m. üçün 1900 dollar kompensasiyanın məqbul olduğu barədə iddialarının əsassız olduğunu bildirib. "Bir daxma və bir memarlıq abidəsi, köhnə bir ev və yenicə əsaslı təmir olunmuş mənzil üçün eyni məbləği ödəmək olmaz”, deyə Ağayev bildirib.
O, məruzəçilərin alqı-satqı müqavilələri haqqında mövqeyini əsassız adlandırıb. İnsanlar özləri alqı-satqı müqavilələrini imzalayıblar, çünki onlara təzyiq göstərilib və onlar zorla köçürülmə və bomja dönmə təhlükəsi ilə üz-üzə qalıblar, deyə vəkil bildirib.
"Dünənki görüşdə Mora mənə nə qədər kompensasiya təklif olunduğunu soruşdu. Cavab verdim ki: "Mənim önümə pul atırlarsa, onu heç vaxt götürmərəm. O sizsiniz ki, rüşvəti yalaya bilirsiniz””, deyə Yunus bildirib.
O hesab edir ki, məruzəçilər hökumət tərəfindən ələ alınıb və dəyişdirilməlidir, belə ki, onlar öz məruzələrində real vəziyyəti əks etdirmək niyyətində deyillər.
Yunus bildirib ki, ölkənin vətəndaş cəmiyyətinin 20 fəalı adından AŞPA-ya məruzəçilərə etimadsızlıq haqqında müraciət göndərilib.
Bundan başqa, AŞPA deputatlarına, beynəlxalq hüquq müdafiə təşkilatlarına müraciətlər göndərilib. Bu müraciətlər "Mora-Qreş – korrupsiyaya uğramış siyasətçilər” şüarı ilə müşaiyət olunacaq, deyə Yunus vurğulayıb.
Qeyd edək ki, bu gün axşam məruzəçilərin mətbuat konfransı keçiriləcək.
|
