 Hərdən dostlarım deyir ki, bu oliqarxiya ilə işin olmasın, mədəniyyətimizdən yaz, artıq 2-ci baş redaktoru da tutublar, səndən də narahatıq. "Baş üstə” deyirəm, söz də verirəm, amma nə edim ki, bu oliqarxlar "əməli fəaliyyətdədirlər”, millətin anasını ağladırlar... Bu dəfə də siqnalı Nəqliyyat Nazirliyindən aldıq. 21 avqustda gecə 3-ün yarısı Ziya Məmmədovun qoçuları Bayram Bayramov adlı sürücünü nəyi var "çırpıblar”.. A kişi, vallah hərc-mərclikdir, biz də demokratiya davası aparırıq....
Gülməli məmləkət...
Dəhşətdir vallah. Bu məmləkətdə artıq "donoslarla” cinayət işi açılır. Bir donosla Hilal Məmmədov həbs edilir, o birisi "donosla” mərhum prezident Elçibəyin zəhərlənməsi "faktı” aşkarlanır və onu zəhərləyənin "ovuna” çıxılır... Deyəsən doğurdan da analoqsuz məmləkətdə yaşayırıq, "Qanunun aliliyi” artıq "Alilərin qanunu” termini ilə əvəzlənib. Bir siqnal kifayətdir ki, heç bir sübut-dəlil olmadan səni illərlə qazamata atsınlar. Əvəz Zeynallıda belə olmadımı? Adını belə yazmaq istəmədiyim deputat guya ki, Əvəzin ondan 10 min manat tələb etdiyini iddia edir, buna görə Əvəzi atırlar içəri. Olmazdimi ki, Əvəzi həmən pulu alan yerdə həbs edəydilər? Olmazdı, çünki Əvəz həmən deputatdan heç nə tələb etməyib, etsəydi dərhal əməliyyat qrupu bunu video çəkilişlərlə həyata keçirərdi, Əvəz pulu alan yerdə həbs edilərdi, ancaq Əvəzi bir "donosla” həbs etdilər. Bu gün bu "donosbazlar” bu "donosların” hesabına "karyeralarını” qururlar, evlərinə "halal çörək” aparırlar, amma başa düşmürlər ki, bu "donosa” görə yedikləri hər tikəyə görə bu dünyada olmasa da, (Xıdo cəzanı qiyamətə saxlamaz, hər kəs cəzasını məhz bu dünyada bu və ya digər formada alır) o dünyada bir teşt qan qusacaqlar. Əvəz 10 min istəyib, lap belə əcəb eləyib, mən də 1 milyon istəyirəm, mən də Kanar adalarında 100 milyonluq villa istəyirəm, artıq istəmək də olmaz? Ancaq sizin nə isə istəmək hüququnuz var? Bu nə düşüncə tərzidir, bu nə idarəetmədir? Artıq sübuta ehtiyac yoxdur, biri desə ki, filankəs filan şey istəyib, kifayətdir, həmən adam dərhal həbs edilməlidir, əgər bu adamın nə isə istəmək "şansı” yoxdursa, ona bir cibli paltar geyinmək kifayətdir, cibi olnasa da olar, evdən cibli paltar tələb edib, içindən narkotika çıxarda bilirlər. Həbs edilmiş bütün din xadimlərinin ciblərindən narkotik maddələr götürülüb, sanki dindarlar hamısı narkoman imişlər, sonra da dövlət başçısı Ramazan bayramında deyir ki, İslam terror demək deyil. İndi mən bicbala ingilisə bunu necə sübut edim, axı o mənə deyər ki, İslam necə terror demək deyil ki, Azərbaycandakı bütün İslamçılar narkomandırlar, narkomannan isə nə desən gözləmək olar, lap elə terror da...
Canım ay İran...
İrana getmək istəyirəm. Artıq ağrılarım dözülməz həddə çatıb, əksər Azərbaycan vətəndaşları kimi mənim də burdakı həkimlərə inamım itib, istəyirəm gedib özümü İrandakı həkimlərə göstərim. Amma qorxuram, çünki ola bilsin ki, İrandakı həkimlər də bizdəki həkimlər kimi "ora” işləsinlər, məni "verbovka” eləsinlər, məndən "dövlət sirrlərini” öyrənsinlər, zatən mən uzun müddət "yüksək dövlət vəzifələrində” işləmişəm, o qədər sirr bilirəm ki, heç adına qurban olduğum Artur Rəsizadə bu qədər sirr bilmir. İndi fikirləşirəm ki, İrana getsəm orda mənim saqqızımı oğurlayıb, bütün bu sirrləri məndən alacaqlar, əvəzində də mənə bir İran "çox sağ ol”u deyəcəklər, deyilənlərə görə Hilal Məmmədovun yanında da boş bir yer var. Nə isə, indi bilmirəm İrana gedim, getməyim... Bilsəm ki, bizim prokurorluq İran keşikçilər ordusunun xüsusi xidmət əməkdaşlarının siyahısını mənə verər, çox sevinə-sevinə həmən siyahını onlardan götürərdim, yoxsa mən binəva nə bilim ki, orda kim kimdir? Hörmətli Zakir Qaralov, siyahı üçün nə vaxt gəlim?
Talış Ağsaqqallar Şurası və İctimai Palata
Yaranmasının bir il olmamasına baxmayaraq Talış Ağsaqqallar Şurası çox iş görüb, elə bircə onu qeyd etmək kifayətdir ki, mərhum Novruzəli Məmmədovla Hilal Məmmədovu "cəsusluğa cəlb etmiş” Əli Əbdolinin təkzib məktubunu məhz ictimaiyyətin diqqətinə ilk olaraq Talış Ağsaqqallar Şurası çıxartdı. Ümumiyyətlə Talış Ağsaqqallar Şurası Azərbaycanın tam demokratikləşməsində çox maraqlıdır və bu yöndə mütamadi addımlar atır. Bu addımlardan biri də Şuranın 19 avqust tarixli iclasında atıldı. Talış Ağsaqqallar Şurası İctimai Palatada təmsil olunmaq üçün İctimai Palataya müraciət etdi. Əgər İctimai Palata Talış Ağsaqqallar Şurasının müraciətini müsbət qiymətləndirərsə Talış Ağsaqqallar Şurası İctimai Palatanın işində yaxından iştirak edəcəkdir. Hesab edirik ki, Talış Ağsaqqallar Şurasının İctimai Palatada təmsilçiliyi baş tutarsa, digər milli azlıqlar da öz təşkilatlarının İctimai Palatada təmsilçiliyinə razılıq verəcəklər və İctimai Palata həqiqətən də Azərbaycanın bütün icmalarının bir yerə yığışdığı bir təşkilat ola biləcək, bütün icmalar bir yerə yığışarsa, bu artıq bütün Azərbaycan deməkdir.
Mən hazır...
"Orda” işləyən dostlarım mütamadi olaraq mənə gizli yollarla siqnallar çatdırırlar. Aldığım siqnallardan məlum olur ki, bir sıra şəhər və rayonlarımızda mənim haqqımda məlumatlar yığılır, artıq Lerikdə, Lənkəranda, Masallıda, Bakıda və Sumqayıtda qovluqlar dolub, bir ip ucu axtarırlar ki, məni "hop-stop” eləsinlər, heç vecimə də deyil, onsuz da bu dünya bizimçün zindandır, 5-6 il də hökumətin şotuna dincələrəm, açıq deyirəm, mənə heç vəkil də lazım olmayacaq, heç müdafiə komitəsinin də yaranmasını istəmərəm, nə desəz, nə ittiham irəli sürsəz, mən hazır, qəbul edərəm, təki sizlərə söz gəlməsin, təki evlərinizə növbəti dəfə yeməyə bir teşt laxta qan apara biləsiz, nə olacaq ki? Rafiq bu gün var, sabah yoxdur, ancaq evlərinizdə artıq həmən laxta qanlara tamarzı olanlar o laxta qanı səbirsizliklə gözləyirlər. Nuş olsun deyə bilmərəm, çünki kiminsə şərlənməsi ilə qazanılan pul-laxta qan adama nuş olmaz, amma burnunuzdan gələcək, bunu görmək üçün Amerikaya getmək lazım deyil, elə camaatı şərləyib tutduran keçmiş polis yoldaşlarınızın aqibətinə baxın, heç biri pensiya yaşına çatmır, hərəsi bir sağalmaz xəstəlikdən dünyalarını dəyişirlər və yığdıqları varidatı da ölən günlərinəcən həkimlərə yedizdirirlər. Nə isə, moizə oxumaq fikrindən uzağam, onsuz da bu məmləkətin İslama heç bir aidiyyatı yoxdur, lap fironların Misirinə oxşayır. Deməyim odur ki, mənə görə camaatı incitməyin, ora-bura çəkib onları bezdirməyin, imkan verin dolansınlar, sizin əlinizdən qohumlarıma da salam verməyə qorxuram, nə sözünüz var mənə deyin, çıxış yolunu məni həbs etməkdə görürsüzsə mən hazır, məni həbs edin, ancaq bu çıxış yolu deyil, çıxış yolu Azərbaycanda hamının haqqının tanınmasıdır, çıxış yolu sadə vətandaşlara qul kimi baxmağı tərgitməkdədir, çıxış yolu bir qrup quldurun yox, xalqın dediyi ilə oturub-durmaqdadır, çıxış yolu məddahların sizə xoş gələn yalanlarına qulaq asmaqda yox, sizə ağır gələ biləcək həqiqətləri dinləyib, onlardan nəticə çıxartmaqdadır, çıxış yolu hansısa fərdin guya ki, vergidən 100 manat gizlətməsini aşkarlayıb, gözümüzə soxmaqda yox, çıxış yolu az qala Azərbaycanın hər kəndində villalar tikən, zavodlar, fabriklər ucaldan dövlət məmurlarının bu qədər varidatı haradan oğurladıqlarını araşdırmaqdadır, çıxış yolu xalqı oliqarxlara yox, oliqarxları xalqa nökər etməkdədir. Bütün bunlar edilərsə Azərbaycan xilas olacaq, edilməzsə... onda yeni-yeni zindanlar tikin, çünki artıq xalqı yalanla, iftira ilə, hədə-qorxu ilə idarə edə bilməyəcəksiz, xalqın qəzəbi isə dəhşətli olur, bunu gözünüzün qabağından çəkməyin...
Rafiq CƏLİLOV,
celilovrafiq@mail.ru,
"Tolışon Sədo” N: 28(40) 24 avqust 2012
|
