 Masallı rayonunun Kolatan kəndinə təbii qaz xəttinin çəkilməsi üçün Rusiyada yaşayan Kolatanlıların göndərdikləri 87 min məbləğində ABŞ dolları və hər təsərrüfat başçısından 100 manat hesabı ilə yığmaqla, cəmi 280 min dollar pulu rayonun sabiq İHB-sı Qəzənfər Ağayev necə həzm etdi?
Bu cinayəti ört-bastır etmək üçün Lənkəran prokurorunun müavini, həmyerlisi Taleh Osmanovun talışları əsassız olaraq telefon zəngləri ilə təhdid etməsi, hal-hazırda qurama ittihamlarla həbs edilən hüquq müdafiəçisi, prafessor, "Tolışi Sədo” qəzetinin baş redaktoru Hilal Məmmədovla əlaqələndirməsi təəccüb doğurur.
Bu yazıda, başlığı, müəyyən məqamlar istisna olmaqla, linqi yeni olmasa da, keçmiş məqamlara ekskurs edərək, bəzi hüquq-mühafizə orqanları əməkdaşlarının qanunsuz əməllərini diqqətə çatdırmaq zorundayam.
20 iyul 2009-cu il "Cənub Xəbərləri” qəzetinin 19-cu sayının manşetində yer alan "Xeyriyyəçi niyə küsüb?" başlıqlı yazı yəqin ki, qalmaqallı hadisələri ilə oxucuların yaddaşından silinməyib. Həmin yazıda əsas məsələlərdən biri də Masallı rayonunun Kolatan kəndinə təbii qaz çəkilişi ilə bağlı, kənddən Rusiyaya bir tikə çörək pulu qazanmaq üçün öz ayaqları ilə deportasiya olunan gənclərin 87 min ABŞ dolları göndərsələr də, bu pulun bəzi məmurlar tərəfindən mənimsənilməsi barədə xəbər vermişdim. Camaatın təbii qaz çəkilişi üçün verdikləri pulun mənimsənilməsinə hüquqi don geyindirmək üçün sabiq İHB-sı Qəzənfər Ağayev kəndə Az.TV-dən çəkiliş qrupu dəvət etmişdi. Kənd bələdiyyəçilərin canfəşanlığı ilə qaz balonundan "şlanqla” qaz çəkib, məşəl yandıraraq, camaatın alqışları altında kəndə təbii qaz çəkilməsi kimi çəkiliş apardıqdan sonra, həmin saxta kadrlar efirə buraxıldı.
O ərəfədə qaz xətti çəkilişi bəhanəsi ilə Kolatan, Sığdaş, Xanalyon, Babakücə, Ninalov kənd bələdiyyəçiləri sabiq İHB-sı Qəzənfər Ağayevin göstərişi ilə SSRİ dönəmindən qalan dəmir qaz boru xətlərini söküb, satdılar. Çox keçmədi ki, əhalini aldatmaq məqsədi ilə təkcə Bala Kolatana qaz xətti çəkildi. Bu da kənd əhalisində "o kəndə qaz çəkilibsə, digər kəndlərə də çəkiləcək” fikirinin formalaşdırılmasına hesablanmışdı. Yəni ki, təkrarən camaatdan "pul yığma” kompaniyasına start verilsin. Əhalinin çoxu mal-qarasını satıb, qaz çəkilişi üçün pul vermələrinə baxmayaraq, bu günə kimi təbii qazın gəlişini səbirsizliklə gözləyirlər. Dərdlərini deməyə isə ünvan belə tapa bilmirlər. Digər tərəfdən də Talış Sıra Dağlarının meşələri təbii qazın olmaması ucbatından amansızlıqla doğranılıb, məhv edilir. Burda da qazanan kriminallaşmış hüquq-mühafizə orqanlarıdır ki, meşədən odunla dolu çıxan maşınlar ya polis idarəsinə aparılır, ya da yerindəcə "ödənişdən sonra” buraxılırlar. Sübut üçün Məmmədoba kəndi yaxınlığında "Seyid qızı ocağı” adlanan yerdə polisin qanunsuz post qurduğu yerin şəkilini bu yazıya əlavə edirəm.
Bu da azmış kimi, həmin ocağa gətirilən nəzir puluna da şanlı polisimizin şərik olması lap ürək bulandıran əməl kimi görünür.
Əlbəttə ki, meşələrimizin amansızlıqla məhv edilməsi tamamilə başqa mövzunun söhbətidir, lakin kəndlərdə qazın olmaması ucbatından meşələrimizin qırılıb, məhv edilməsindən də yan keçmək mümkün deyil.
Əziz oxucu, bu kimi böyük cinayətləri mütəmadi olaraq mətbuat səhifəsinə və internetin sosial şəbəkələrində yazdığıma görə həmişə təhdid, təhqir və polis zorakılığı ilə üzləşirəm. Mənim çox ehtiyyat edib, qorxduğum bir iş var ki, məni də digər günahsız insanlar kimi narkotiklə, yaxud başqa ağlasığmaz bir işlə şərləsinlər. Açıqca bəyan edirəm ki, mən bu hökumətdən bir qəpik də almıram, rusiyada işləyən övladlarım mənə dolanmaq üçün hər ay pul göndərirlər. Ötən il oğlum Ziya kəndə gəlib, mənimlə şərtləşdi ki, "ata, sənə yaxşı bir BMV maşını alıram, amma sən əlini kompüterdən üz, heç bir problemlərdən yazma, heç bir siyasi, sosial məsələlərə baş qoşma”. Razılaşdım. Maşın alandan sonra bir çox insanların məmurlar tərəfindən alçaldılaraq, incidilmələri ilə rastlaşanda yenə dözməyib, başladım yazıb, onların hüquqlarını müdafiə etməyə.
Mənim əzizlərim, fikirləşməyin ki, əsas məsələdən yayınıram, yox, sadəcə Taleh Osmanov kimi prokurorluq əməkdaşlarına kiçik bir mesajımı ictimailəşdirirəm. Heç kimə sirr deyil ki, Hilal Məmmədov əsassız olaraq, Azərbaycanın hüquq-mühafizə orqanları tərəfindən şərlənərək həbs edilib. Onun həbs olunmasının motivi barədə istər ölkə daxilində, istərsə də beynəlxalq təşkilatlarda fikir birmənalıdır: Hilal Məmmədov şərlənib! Hilal Məmmədovun azadlığa buraxılması barədə beynəlxalq təşkilatlardan kifayət qədər tələblər gəlsə də iqtidar Hilal Məmmədov haqqında yeni "nağıl-dəlillər” toplamaqla məşğuldur. Demokratik qüvvələr və Müdafiə Komitəsinin həmsədri Rafiq Cəlilov beynəlxalq təşkilatların bəyanatlarını mütəmadi olaraq ictimailəşdirlər. Diqqətinizə çatdırmaq istədiyim əsas məqamlardan biri də hüquq-mühafizə orqanlarının ölkədəki əsas cinayətkarları buraxıb, ağlasığmaz, yeni "cinayətkar” ovuna çıxmalarıdır. Kimlər ola bilər bu "cinayətkarlar”?
Bu suala bir qədər aydınlıq gətirmək zorundayam. Bildiyiniz kimi Hilal Məmmədov ağır maddə ilə, əsassız olaraq ittiham olunur. Bu fonda kimlər ki, hakimiyyətin qanunsuz əməllərinə qarşı etirazını bildirir, oğru məmurların "əl-ayağına dolaşır”, həmən şəxslərdən kimlərsə Hilal Məmmədovla bir stolda oturub, çay içiblərsə, həmin adamları Lənkəran prokurorunun müavini Taleh Osmanov 0503436861 nömrəli mobil telefonu ilə qanunsuz olaraq prokurorluğa çağırır, izahatlar toplayır.
Çox adamlar isə hüquq-mühafizə orqanlarının bu qanunsuz və ədalətsiz həbsetmə kompaniyasından yaxasını qurtarmaq üçün ölkəni tərk etməyə üstünlük verirlər. Anoloji hal mənimlə də baş verdi, 24 avqust 2012-ci il tarixdə, saat 10 radələrində, yuxarıda qeyd etdiyim mobil nömrə ilə mənə zəng edib, Lənkəran prokurorluğuna ifadə vermək üçün dəvət etdilər. Bu dəvətin motivini soruşdum, bildirildi ki, "sənin telefon nömrəndən edilmiş zənglə bağlı bir məsələ var”. Talış bölgəsinin ictimaiyyətindən mənə daxil olan məlumatlardan bilirdim ki, Taleh Osmanov prokurorluğa çağırdığı adamları Hilal Məmmədovla əlaqələndirib, izahatlar alır...
Bu qanunsuz çağırışdan sonra mən də bu ölkəni tərk etmək fikrinə düşüb, ertəsi gün Astarxan şəhərinə, 01 sentyabr tarixinə qatara bilet aldım. İki gün keçəndən sonra isə qərara gəldim ki, ölsəm də öz Vətənimdə ölməliyəm. Nələr başıma gəlsə də bu mənim alın yazımdır, mübarizəmi də davam etməliyəm ki, gələcək nəsillər məni qorxaq kimi yad edib, qəbrimi söyməsinlər. "Yüz il qul olmaqdansa, bir gün AZAD yaşamaq daha şərəflidir” fikri ilə biletimi geri qaytardım. Mübarizəm isə davam edəcək. Mənə elə gəlir ki, mənim məhz Lənkəran prokurorluğuna çağırılmağımın əsas səbəbi, mənim mütəmadi olaraq Qəzənfər Ağayevin və digər məmurların Kolatan camaatını aldadaraq, təbii qaz çəkilişi üçün onlardan yığıb, mənimsədikləri 280 min dollar pulun geri qaytarılması üçün KİV-lərdə yazdığım yazılardır. Yaşadığım Masallı rayonuna yeni təyin olunan icra başçısı Rafil Hüseynovu başa salmışdılar ki, Kolatanlılarla belə bir problem var və bu problem KİV-nin gündəmindən düşmür. Odur ki, Rafil müəllim Kolatanlılarla ilk görüşündə söz verdi ki, "həzm edilmiş” qaz pulunun qaytarılması barədə hüquq-mühafizə orqanlarına göstəriş verəcək və cinayətkarlar ifşa olunacaqlar. Əfsus ki, bu olmadı, Kolatanlıları susdurmaq üçün kəndin tibb məntəqəsini kosmetik təmir etdirib, bu təmiri isə təm-təraqlı formada yeni inşa edilən bina kimi təqdim edib, qırmızı lentlə sarıyıb "açılışını” da təşkil etdilər. Hələ bələdiyyəçilərin onun ayaqları altında nisyə "qurbanlıq qoyun” kəsib, bəzi "kefli İsgəndərlərlə” araq içmələrindən danışmıram. Oxucu bilir ki, bu barədə ətraflı yazmışdım. Bir daha bu yazımda da qeyd edim ki, MM-in deputatı xanım Elmira Axundova Kolatana qaz çəkilişi ilə bağlı mənim bütün yazdıqlarımı əhali qarşısında dilə gətirərək, təsdiqlədi. Mən də həmin çıxışları diktafonuma yazmaqla, çoxlu maraqlı şəkillər də çəkib, elə həmən gün bir çox saytlarda yerləşdirdim. Tibb məntəqəsinin açılışının reallıqlarını internet saytlarında özləri də izlədikdən sonra, bələdiyyəçilərə "nişan toyu” tutulur ki, onlar niyə mənə şərait yaratdılar ki, o çəkilişləri edim.
Məlum məsələdir ki, həqiqəti yazdığıma görə İHB-sı Rafil müəllim mənə qarşı heç bir ittiham irəli sürə bilməzdi. Daha optimal variant isə Astara rayonunda hazırda İHB-sı işləyən Qəzənfər Ağayevin öz həmyerlisi Taleh Osmanovla xosunlaşıb, məni Hilal Məmmədovun qanunsuz ittihamına calağ edib, susdurmaq planıdır. Mən, ətrafımda baş verən hadisələri məhz bu cür dəyərləndirirəm.
Mətləb Dadasşov
Azərbaycan Jurnalistlər Birliyinin üzvü
"Tolışon Sədo” N: 30 (42) 07 sentyabr 2012
|
