Möhtərəm Məhkəmə, hörmətli məhkəmə iştirakçıları. İlk öncə, məhkəmədə şəxsən iştirakımı təmin etdiyinizə görə Sizə minnətdarlığımı bildirirəm. Bir neçə gün öncə məhkəmə sədrinə və hakim kolegiyasına ünvanladığım açıq müraciətdə bildirdiyim kimi, mən narkotika adlı çirkabın zahiri görüntülərini yalnız 1-2 bədii filmlərdə görmüş və bu yaşımacən bircə dəfə də olsa əllərim o zəhrimara toxunmamışdır. Belə ki, həm ilkin ailə tərbiyəm və həm də sonralar daha ciddi şəkildə formalaşmış mənəvi, dini, pedaqoji əxlaqım məni bu və hər hansı başqa haram şeydən uzaq olmağa vadar etmişdir.
Barəmdə düzüb-qoşulan qondarma istintaq əməliyyatı və məhkəmə-istintaq prosesləri, tələb edilən daktoloskopik, psixoloji və i.a. hüquqi ekspertizalar aparılmadan, müstəntiqin məhkəmədə “buna ehtiyac duyulmadı” və üzümə duran 4 polisin yalançı şahidlik ifadəsiylə tamamlandı. İki hal şahidindən biri müəmmalı şəkildə vəfat etdi, digəri isə vətəndaşı olduğu Rusiyaya köçdüyündən məhkəmə prosesində onlar dindirilmədi. Məhkəmədə şahidlik edən polislər tərəfindən hal şahidlərinə diktə edilmiş ifadələr sadəcə oxundu... Bu onu subut edir ki, 9,5 mln əhalisi olan olkəmizdə istənilən vətəndaşı, əgər o, vətəndaş fəallığı göstərib hakimiyyət orqanlarına, və ya onun təmsilçilərinə fərqli, və ya digər müxalif mövqedən münasibət (azad söz, fikir və digər fundamental hüquqların verdiyi imkanlar əsasında) nümayiş etdirərsə, ciblərinə eyni saxta metod və üsullarla narkotik atdırılıb, yalançı şahid, ekspert rəyləri və i.a. “düz-qoş”la həbsə atmaq, və onları Azərbaycan Respublikası adından uzun müddətə azadlıqdan məhrum etmək mümkündür...
Bu minvalla son günlərəcən, o cümlədən, bu günlərdə Strasburqda keçirilən AŞPA-nın sesiyasında olkəmizdə insan haqqlarının qorunduğunu və heç bir siyasi məhbusun olmadığını iddia edən siyasi rəhbərlərimiz, əslində özləri özlərini aldatmış olurlar. Belə ki, artıq cəmi dünyanın tərəqqipərvər və azad insanları, o cümlədən, ölkəmizin bütün vicdanlı hüquq müdafiəçiləri və digərləri də yuxarıda qeyd edilən xarakterdə bəhs edilən şəxslərin, o cümlədən mənim birmənalı olaraq siyasi məhbus adlandırılmağına şəkk etmir, o cümlədən AŞ, AB, BMT, ATƏT kimi rəsmi və digər ictimai beynəlxalq təşkilatlar da buna şəkk etmir.
Odur ki, bu kimi qondarma işləri düz-qoş etmiş insanlara məsləhət bilərdik ki, dünya ictimaiyyətini daha ciddi hüquqi dəlillərlə inandırmağa çalışsınlar. Məsələn, mən təklif edərdim ki, ciblərimizə ya evlərimizə atdırdıqları narkotik ya silahların üzərinə xüsusu tipli moment yapışdırıcısı səpərək birbaşa ovuclarımızın içərisinə qoysunlar ki, heç özləri də xüsusi alətlər olmadan qoyduqlarını oradan qoparda bilməsinlər. Belə olan halda daktoloskopik ekspertiza da onların istəklərinə uyğun olaraq rahat müsbət rəy vermiş olar.
Ünvanıma yapışdırılan digər – CM 274 (dövlətə xəyanət) və 283.2.2 (milli-dini ayrıseçkilik salma) maddələrinin isə 234.4.3-lə heç cürə uyuşmadığını nəzərə alsaq, onların daha keçərli maddələrlə əvəzləmək barədə "ixtiralar"a rəvac vermək olardı. Belə ki, nəinki AŞPA-nın deputatlarına, hətta sərgərdan həyat sürən ən bisavad olan küçə avaralara da bəllidir ki, hər hansı ölkənin xeyrinə casusluq edən şəxsin həmin ölkədən narkotik alması faktı şərləmə və böhtanlama qarşısında belə acizdir. Xarici ölkəyə işləyən casusın ölkəsindəki rejimə qarşı fəal müxalif mövqe nümayişı də ölkəmizin hüquq sisteminin "kəşfi" adlandırmaq olar. Belə ki, 7 saylı CÇM-də cəza çəkən bir məhkumun DİN və Respublika Prokurorluğuna ünvanladığı “zəhmətkeş” donoslarıyla bir-birinə ziddiyyət təşkil edən belə ittihamlarla mən təqsirli bilinmiş və beş il azadlıqdan məhrum edilməmlə bağlı barəmdə hökm çıxarılmışdır. Mən artıq 6 aydır ki, haqsız olaraq 17 saylı CÇM-də “islah” olunmaqdayam. Bu 6 aylıq təcrübə bir daha məni əmin etdi ki, heç bir dustaq könüllü formada belə “işverənlik” etməz, hətta, təqsirləndirdiyi şəxs ən qatı cinayətkar da olsa. Hakimiyyətin şikarını nəcə ələ almasının hüdudlarını təsəvvür etmək o qədər də çətin deyildir...
Möhtərəm Məhkəmə! Sizə ünvanladığım açıq məktubda etdiyim son tövsiyyəmi bir daha təkrar edirəm: 2х2=4 demək haqqınıza sahib çıxmaqla AZADlığa çıxın... Biz onsuz da türmədə də azadıq, amma Sizlərin vəziyyətinin nə qədər ağır olduğunu da gözəl bilirik...
Sonda mən ölkə ictimaiyyətinə səslənərək deyirəm: Dünən axşamçağı 17 saylı ciddi rejimli CÇM-dən “Kürdəxanıya” etap olundum. Bu 700-800 nəfərlik zon ölkədə Penitensiar Xidmətin nəzdindəki “tubdispanseri” təcrübə ploşadkası kimi də tanınır... Buranın sakini olan məhbusların 90%-i narkoman olmaqla yanaşı ağır spid, vərəm, dəri, hepatit və i.a. xəstəliklərinə yoluxanlardır. İnanın ki, bura bəlkə də ölkənin ən dəhşətli xəstə zonudur, burada istənilən təsadüf nəticəsində ən ağır xəstəliyə düçar ola bilərsən... Elementar hesablamalar göstərir ki, yaxın 10 il ərzində əksər ölkə əhalisi, məxsusən də gənclərimizin əksəriyyəti narkotika bəlasından yaxa qurtara bilməyəcək... Bu barədə mütləq düşünmək gərəkdir...
Xalqı, ölkəmizi xilas edin!
25 iyun 2014-cü il
